Mønsterplanen 1987 · samiske fagplaner 1989, s. 82 (skann 84)

KAPIHTAL 7 DUODJI Sámi kultuvrras lea duodji deahálaš ja ealli oassi. Ovdalaččas manai duodjeoahppu lunddolaččat váhnemis mánnái. Odne ii doaimma šat dát lunddolaš oahppu iešalddis go váhnemiid ja mánáid oktavuođat árra agis juo boatkanit servvodaga gáibadusaid ja bajáshuksema geažil. Skuvlajahki gáibida eanas máná áiggis. Maiddái ollesolbmuid ja váhnemiid dilli lea nuppástuvvan. Ollugat eai leat šat vuođđoealáhusain. Dát maid váikkuha ahte ruoktu ii leat šat duoji ovddasteaddji seamma láhkái go ovdal. Danin lea ge deahálaš várjalit duoji. Otná dilis lea dárbašlaš ahte sihke mánáidgárdi ja skuvla fuolahivčče oahpu mánáide. Vuođđoskuvllas ferte duodji šaddat fágan skuvlii, ja duodjeoahpaheapmi berre vuđolaččat ja ollislaččat oahpahuvvot mánáide. Duoji fágasátneriggodaga čađa čuovvu earret eará giellaoahppu ja gielladikšun. Muhto duoji sierralaš sisdoallu čájeha maiddái ruovttoluotta sámi eallimii ja bargguide. Duodji lea oassi kulturárbis, ja danne lea skuvla geatnegas atnit das fuola. Ulbmi Duodjeoahpahus galgá: - oahpasmahttit ohppiid iešguđet lágan duodjái ja hárjehit sin vuoitit praktihkkalaš váttisvuođaid badjel stáđis- ja návccalašvuođain - hárjehit ohppiid duddjot iešguđet lágan ávdnasis ja oahpahit sidjiide geavahit dipma ja garra ávdnasiid. - oahpahit ávnnasdáiddu - hárjehit ohppiid árvvoštallat ja veardádallat iešguđet lágan duoji ja dáiddolašvuođa - hárjehit ohppiid duodjebiergasiid geavahit - dikšut ráhkadeaddji doaimma - buoridit iešdovddu ja ovddidit oadjebasvuođa ohppiin - várjalit kultuvrra gielladikšumiin, nu go seailluhit fágásániid mat gullet duodjái 82

Mønsterplanen 1987 · samiske fagplaner 1989 s. 82 skann 84

Siter