Mønsterplanen 1987 · samiske fagplaner 1989, s. 69 (skann 71)

– addit dieđuid sámi musihkkakultuvrra birra ja movttiidahttit musihkkadoaimmaide mat leat čadnon sámi musihkkii. – nannet ohppiid sápmelaš iešdovddu ja sosiálalaš gullevašvuođa, ja ovddidit fuola musihkkalaš vugiid eatnatvuhtii. – addit dieđuid etnomusihkkakultuvrraid birra sámivuođa vuođul. Oahppoávdnasat ja ovdaneapmi Sámi musihkkaoahpahus galgá addit musihkkačielggadeami ja movttiidahttit musihkkalaš doaimmaide. Oahppoávdnasat sisttisdollet ovtta oasi mii lea oktasaš musihkkaoahpahusas buot riikka vuođđoskuvllain lassin ovtta oassái mii sisttisdoallá sápmelaš musihkkakultuvrra. Oahpahus galgá maiddái movttiidahttit musihkkadoaimmaide mat leat čadnon sámi musihkkii. Oahpaheapmi musihkas galgá álggahuvvot ohppiide peršuvnnalaš ja musihkkakultuvrralaš dásis. Sámi musihkkaoahpahusas lea danin deatalaš heivehit oahpahusa vai váldo vuhtii ohppiid musihkkakultuvrralaš biras nu go ohppiid ruovttut ja birasgoddi, ránnját ja gilli ja gávpot. Soames ohppiide sáhttá heivet álgit sámi musihkain ja musihkkavugiin – sámegiel lávlagiiguin ja sálmmaiguin, ja juigosiin– ja geavahit dáid álggahussan dan dábálaš oahppo- ja doaibmaoassái. Eará birrasiin sáhttá fas heivet buorebut álggahit sámi musihka ja musihkkavugiid dábálaš oasi bokte. Oahpaheapmi ferte maiddái heivehuvvot ohppiid vuosttašgiela ektui. Go ohppiin, geat ožžot sámi musihkkaoahpahusa, lea nu máŋggalágán vuođđu musihkas, de ferte čájehit stuorra muhttinvuođa (fleksibilitet) oahpaheamis. Sámi musihkka ja musihkkakultuvra berre liikká šaddat gullevaš oassin musihkkaoahpahusas, vai šattašii seamma lunddolaš geavahit sámi musihka go eará musihka go galgá ovdamearkkaid addit. Mii de galggašii leat dohkálaš vuolgga go galgá veardidit ihtaga, hámi ja funkšuvnna (geavahusa) ferte datte ge heivehuvvot ohppiid eavttuide. Go vállje ja ráhkada oahppoávdnasiid, de galgá jurdagis atnit ahte oahppit galget bessat deaivvadit buori musihkain. Dát fas galggašii ohppiid iežaset ávžžuhit álgit musihkkalaš doaimmaide. Oahppit berrejit oahpahuvvot leat rahpasat daidda osiide musihkas mat muosáhusaid boktet. Oahppoávdnasat galget maiddái ráhkaduvvot dan nammii ahte deattuhit mo musihkka geavahuvvošii ovddidit áigeloaktima, nákcenilu, ovttasbarggu ja oktavuođa. Oahppit berrejit oažžut rehálaš beroštumi sierralágán musihkkii, ja musihkkaoahpahus berre šattahit fuomášumi dasa mo jienaid geavahit. Dát fuomášuhttin maiddái veahkehivčče ohppiid dan beroštupmái mii guoská musihka kvalitehtii ja árvui. Váldojurdda oahpahusas lea ahte oahppit galget oažžut áddejumi maid musihkas sáhttá almuhit. Go lea vejolaš, berre maid boahtit ovdan mo mii sierralaš musihkkavugiin sáhttit muitalit ja govvidit nu go juigosiin. Fága diehto-oassi sisttisdoallá sierralágán vugiid čállit musihka, namahusaid mat leat dárbbašlaččat go galgá buktit ovdan musihka ja ságastallat dan birra, ja historjjálaš ja musihkkakultuvrralaš dieđuid mat veahkehivčče ohppiid árvvoštallat musihka geavahusaid dálá áiggis, sierra historjjálaš áigodagain ja eará kultuvrrain. 69

Mønsterplanen 1987 · samiske fagplaner 1989 s. 69 skann 71

Siter