Mønsterplanen 1987 · samiske fagplaner 1989, s. 58 (skann 60)

58 Bargovuogit ja oahpponeavvut Bargovuogit leat deahálaš oassi fága sisdoalus, geahča váldobarggu vuolde «Guorahallat servvodaga». Obbalaš oasi vuolde gávdnojit maid njuolggadusat bargovugiid ja oahpponeavvuid birra. Ferte deaddut biddjot dasa ahte oahppit čuvvot bures mielde oahpahusas, ja ahte sii váldet ovddasvástádusa iežaset oahppamis. Oahppodilli ferte heivehuvvot nu ahte oahppit ieža sáhttet oahppat ohcat dieđuid, ja ahte sii maid seammás ohppet earáin. Oahpadettiin fertejit sii hárjehallat bargat iehčanassii ja maiddái dovddiidit joavkobarggu ja prošeaktabarggu. Oahppit berrejit beassat iešguđet ládje čohkket alcceseaset oahpu, omd. geavahit bargogirjjiid ja mediáid, ja maiddái logaldallamiid ja dramatiseremiid čađa. Dieđut kártta birra ja movt dan galgá geavahit, berre leat guovddážis oahpaheamis. Oahppit berrejit maid beassat bargat historjjálaš diehtogálduiguin. Oaiviliid molsun ja ságastallan lea deahálaš bargovuohki buot luohkáin. Klássas berre hubmot daid bargguid birra maid oahppit leat bargame, ja áššiid birra mat sin mielas leat deahálašččat. Dákkar ságastallan ferte jođihuvvot nu ahte oahppit jurddašišgohtet ja hárjánit guldalit ja árvvoštallat dan maid earát dadjet. Nuppevuoro sáhttá addit ođđa dieđuid sápmelaččaid ja Sámi birra sierra. Muhto dađistaga ferte diet gessojuvvot olles servvodatfága oahpahussii nu ahte dat šaddá oktan oassin obbalaš servvodatfága oahpus. Barggadettiin oahppoávdnasiiguin galget oahppit dovddiidit sámivuođa árvvuid. Sii fertejit maid oahppat hárjánit geavahit sámegiela juohke lágan dilálašvuođain. Buot oahppit galget oahppat dovdat makkár servvodatipmárdus sápmelaččain lea. Oahppu galgá veahkkin ovddidit návccaid ovttasbargamii ja váttisvuođaid čoavdimii, ja oahpahit geavahit máhtu ja oahpu dása. Oahppit galget oahppat dárkilit guorahallat servvodatáššiid mat sin mielas leat deahálašččat ja mat gusket sin eallindillái. Guovddážis galgá leat oahpahallan geavahit veahkkeneavvuid, čoaggit dieđuid iešguđet ge lágan diehtogálduin, bargat daiguin ja árvvoštallat daid. Oahppit fertejit oahppat guorahallat ja čilget buot dieđuid maid sii ožžot mediáin dahje eará ládje. Oahpaheapmi ii galgga dahkkot dušše viesu siste gos hubmo servvodaga birra aivve teorehtalaš dásis. Duohtadieđut galget biddjot dakkár oktavuođaide gos oahppit gávnnahit daid ávkkálažžan. Lea deahálaš geavahit báikkálaš servvodaga oahpaheamis veahkkin, ja bargat viššalit heivehallat dan maid guđe ge guovllus sáhttá váldit mielde oahpaheapmái. Oahpaheapmi berre čadnot áigeguovdilis áššiide, ja áššiide mat leat oahppásat ohppiide, vai servvodatfága šaddá movttiidahtti fágan ja lea čadnojuvvon duohtavuohtii. Oahppit galget oahppat ipmirdit sihke nissonolbmuid, dievdoolbmuid ja mánáid eallima ja eallindili. Oahppu galgá maid ovddidit ovttadássásašvuođa. Ovttadássašvuohta galggašii čadnot iešguđet ge váldobargui. Skuvlagirjerájus gos leat valljit girjjit ja iešguđet lágan neavvut, lea deahálaš servvodatfága oahpaheapmái. Skuvllas dárbbašuvvojit mángga lágan girjjit geografias, historjjás ja servvodatoahpus, kárttat, atlasat, globusat, stáhta čállagat, stuora govat, diehtogirjjit jna. Skuvllas dárbbašuvvojit maiddái iešguđet lágan jietna- ja govvaaoahpponeavvut, filmmat, dáhtáprográmmat ja videoprográmmat jna. Berre maid ávkin atnit gálduid lagasbirrasis mat sáhttet čilget báikkálaš historjjá, geografia ja áigeguovdilis servvodatáššiid.

Mønsterplanen 1987 · samiske fagplaner 1989 s. 58 skann 60

Siter