Mønsterplanen 1987 · samiske fagplaner 1989, s. 36 (skann 38)

Muhto vaikko makkár návccat sis de livčče, ja vaikko man váilevaš giellamáhttu sis de ain lea, de lea buot ohppiin dárbu diehtit ahte sii sáhttet ávkki atnit engelasgielas. Oahppoávdnasat ja ovdáneapmi Amasgiela oahpaheapmi lea váttis ášši. Danin lea deahálaš oažžut oktii čadnojumi ja ollislašvuođa daid iešguđetláge váldobargguid gaskii. Bargoasit gullet oktii ja gokčet gaskkohagaid nubbi nuppi. Oahpu ovdáneamis ferte váldit vuhtii sihke oahpu iešvuođa ja ohppiid návccaid. Dábálaččat ipmirdit oahppit sániid, dajaldagaid ja cealkkahámiid ovdal go sii máhttet daid albmáládje vuos geavahit. Amasgiellaoahpaheapmi berre čađahuvvot dainna lágiin ahte oahppit deaivvadit seamma áššiguin máŋgga geardde ja iešguđet lágán oktavuođain. Juohke háve ipmirdišgohtet sii ain eanet das man birra sii leat oahppame (dárogillii: «spiralprinsipp»). Oahppoávnnas berre leat dakkár ahte oahppit deaivvadit gielalaš áššiguin maid eai velá ieža máhte ollásit seammás go sii hárjehallamiid bokte iešguđetge giellaoasis nannejit dan maid leat oahppan. Jus galgá leat vejolaš addit oahpu ovttaide, fertejit oahppit oahpahuvvot bargat okto nu bures go lea vejolaš, ja ahte sii besset geavahit oahppoávdnasiid mat leat heivvolaččat sin návccaide ja dárbuide. Vejolašvuohta beassat válljet gaskkal iešguđet lágán oahppoávdnasiid ja gaskkal iešguđet lágán bargovugiid, geatnegahttá máŋgga háve ohppiid iežaset oahppama dáfus. Čálalaš barggut galget heivehuvvot oahppi čálalaš čilgennávccaid dássái. Gáibádusat ohppiid bohtosiidda fertejit leat dan mielde maid guhtege oahppi nagoda oahppat. Muhtin ohppiide addá friddjačállin buori vejolašvuođa govvidit jurdagiid, dáhpáhusaid ja oaiviliid. Oahpahus mii lea vuođđuduvvon sámegiela ala, galgá sisttisdoallat čielga neavvagiid mat sáhttet oahpaheaddjái leat veahkkin oahpaheami vuolde. Go vállje bargguid, de ferte válljet dakkár bihtáid main sihke nieiddat ja bártnit beroštit seamma mađe ja maid sii dovdet gusket sidjiide. Váldobarggut gullet oktii ja daid ferte geahččat oppalaččat. Dábálaččat lea muhtin teaksta dahje tema vuođđun oahpahanvuogis. Makkár gielladoaimmaid ja grámmatikalaš osiid birra ságastallagoahtá, lea dan duohken makkár teavsttain dahje temain lea bargamin. Jietnadat ja cealkkanuohtta berre leat oassin beaivválaš giellabarggus. Bargovuogit Dat mii bargovugiid birra čuožžu Minsttarplána obbalaš oasis, guoská maid engelasgillii. Lea dárbbahlaš vurrolagaid atnit iešguđetlágan vugiid go bargá hárjehallamiiguin; oahpaheaddji lea bagadallin, oahppit barget joavkkuin, guovttes ja guovttes ja maiddái okto. Muhtun muddui sáhttá oahpaheapmi dáhpáhuvvan hárjehallamiid bokte mat leat ráhkaduvvon vissis hámi mielde ja main lea čielga ulbmil ja muhtun muddui iešguđet lágán giellaváikkuhusaid bokte.

Mønsterplanen 1987 · samiske fagplaner 1989 s. 36 skann 38

Siter