Mønsterplanen 1987 · samiske fagplaner 1989, s. 10 (skann 12)

Engelasgiella Internašuvnnalaš oktavuođadárbu ja gaskavuođaid buorideapmi lea vuođđun engelasgiela oahpaheapmái vuođđoskuvllas. Oahppit dárbbašit engelasgieloahpu ja máhtu jus galget searvat ovttadássásaš mielláhttun internašuvnnalaš servodahkii. Engelasgiella lea okta dain deahálaščamus amasgielain Norggas. Engelasgielmáhttu addá sápmelaččaide maiddái vejolašvuođaid oažžut oktavuođa eará álgoálbmogiiguin. Teknologia lea joavdan sápmelaččaide nai. Geavahanbagadusat muohtascooteriidda, muhtursykkeliidda ja eará neavvuide leat čállon engelasgillii, ja diekko bokte deaivvadit ge ollugat engelasgielain. Muđui sáhttet sápmelaččat davviriikkain maiddái geavahit engelasgiela sámegiel suopmaniid gaskka gulahallangiellan. Plánas lea deattuhuvvon ahte fága mihttomearri lea oažžut ohppiid gulahallat engelasgielain. Dát lea vuođđojurdda mii guoská sihke fága ulbmiliidda ja oahppoávdnasiidda. Vuohki movt giella doaibmá lea ožžon stuorit saji plánas go ovdal. Gaskavuohta oahpahanmálle ja dan sisdoalu gaskkas, lea deattuhuvvon. Engelasgiela fágaplána lea ráhkaduvvon dainna ipmárdusain ahte oahppit movttiiduvvojit oahppat ja geavahit giela jus sis lea juoga maid háliidit soapmasii dadjat. Plánas deattuhuvvo ahte oahppit movttiiduvvojit dulkot dan maid earát dadjet dahje čállet, jus dat fal lea juoga mii sidjiide lea mávssolaš. Iešguđet lágán stohkosat fága oktavuođas leat maid ožžon saji plánas. Drámá, dahkaluddanstohkosat teavsttaiguin maid oahppit ieža leat ráhkadan, leat maiddái váldon mielde. Engelasgieloahpahusas nannejuvvo sosiálalaš dilli, giela doaimmaid dárkilis čilgema ja mágga lágán bargguid bokte. Mii guoská fágaid gaskasaš ovttasbargui, lea fágaplánaoavku bidjan deattu dasa ahte čájehit movt iešguđet lágán teavsttaid ja temáid eará fágain sáhttá geavahit engelasgieldiimmuin. Lea juolluduvvon unnit sadji muitalit engelasgielat riikkaid dilálašvuođaid birra. Plána váldojurdda lea ahte teavsttaiguin berre eanet bargat. Dás ii oaivvilduvvo dušše ahte oahppit galget máhttit lohkat teavsttaid. Sátni teaksta gokčá buot daid oahpponeavvuid maiguin ohppiin lea dahkamuš, dat maid sii sáhttet lohkat, geahččat dahje gullat. Oahppit berrejit maid geavahit teavsttaid maid ieža leat ráhkadan. Das lea maiddái čujuhuvvon ahte lea deahálaš geavahit álgoteavsttaid. Leat deattuhan ahte oahppit berrejit ieža leat mielde válljet maid sii galget oahppat ja makkár bargovugiid sii galget geavahit. Skuvllain gos sámegiella gullá fágaide, gártá engelasgiella ohppiide goalmmátgiellan. Sáhttá leat váddásit oažžut ohppiid geaidda engelasgiella lea goalmmátgiellan, beroštit dán fágas, go sidjiide geaidda engelasgiella lea nubbingiellan. Okta sivain diesa sáhttá leat ahte sidjiide lea engelasgielaoahppu álggahuvvon beare árrat. Sii leat oahppagoahtán dárogiela ja engelasgiela oktanaga. Diet lea mielddisbuktán ohppiide giellamoivvi, vuosttažettiin vuos danin go engelasgiella ja dárogiella leaba fuolkegielat, ja nuppádassii fas danin go oahppit leat ožžon dien guovtti gielas seamma dásis oahpu. Diet sáhttá dagahan ahte oahppit leat ferten unnit beroštit engelasgielas, vai oahpaše dárogiela buorebut. Mii maid sáhttá dáhpáhuvvat jus beare árrat álgá engelasgiela oahpahit, lea ahte oahppit ohppet heajubut iežaset eatnigiela. Seamma váttisvuođaiguin deaivvadit maiddái sii geain lea dárogiella eatnigiellan ja sámegiella nubbingiellan.

Mønsterplanen 1987 · samiske fagplaner 1989 s. 10 skann 12

Siter