Mønsterplanen 1987 · samiske fagplaner 1989, s. 9 (skann 11)

KAPIHTAL 1 ČILGEHUS FÁGAPLÁNAIDE Dábálaš fágaplánain M 87:s leat álggus čilgejuvvon fága vuođđudusat ja ulbmilat. Dasto čilgejuvvo oahppu ja oahpu ovdáneapmi, bargovuogit ja oahpponeavvut, ja loahpas lea plána juhkkojuvvon váldobargguide ja oassebargguide. Dain čuovvovaš čilgehusain boahtá ovdan mii lea earenoamáš plánain, eanas dan birra mii guoská plánaid heiveheapmái sámi dilalašvuođaide. Kristtalašvuođaoahppu Fágaplána kristtalašvuođaoahpus lea vuođđuduvvon daid áigumušaid ala mat leat kristtalašvuođafágaplánas mii lea M 87:s. Oahppoplána lea heivehuvvon nu ahte sáhttá geavahuvvot buot sámi ássanguovlluin. Oahppoplánai leat váldon mielde oasit kristtalaš vieruin sámiid gaskkas. Dasa leat maid váldon mielde oasit sámiid historjjas ja árbevieruin. Fágaplána lea vuođđuduvvon seamma eavttuid ala mat leat M 87:s. Evangelistalaš – lutheralaš oahppu lea vuođđun oahpaheapmái. Plána deattuha oktasaš kristtalaš vieruid ja jurddašeami. Das maid deattuhuvvo dat mii lea oktasaš daid sierranas oskkuservviin, ja ahte daid iešguđet servviid dovddastusat berrejit adnot árvvus. Viidáseappot sisttisdoallá fágaplána oahppoávdnasiid eará oskkuid ja eará eallinoainnuid birra, maiddái dás berre daid sierravuohta adnot árvvus. Oahppit galget oahppat gierdavašvuođa skuvlla juohkebeaivválaš eallimis, dainna lágiin ahte ohppet atnit árvvus earáid oskku ja vieruid ja ahte ohppet earáid oskku ja eallinoainnu birra. Leastádialaš lihkádusas lea stuora árvu ollu sámi ássanguovlluin. Oahppu leastádialaš lihkádusa birra lea dan dihte ožžon oalle stuora saji plánas. Leastádialaš lihkádusa sáhttá sulastahttit haugianer lihkádusain Norggas ja rosinius lihkádusain Ruoŧas. Muhto dat ii mearkkaš dan ahte leastádialaš oahppu lea dušše sámiide. Eanas oassi leastádialaš oskku dovddasteddjiin eai leat sápmelaččat. 9

Mønsterplanen 1987 · samiske fagplaner 1989 s. 9 skann 11

Siter