Mønsterplanen 1985 · nynorsk, s. 89 (skann 91)

KAPITTEL 16 89 FAGPLANAR OG TVERRFAGLEG UNDERVISNING Oppbygginga av fagplanane Lærestoffet er ordna i fag. På den måten vert stofftilfanget samla oversiktleg og systematisk, og læraren kan lett halde auga med at viktige delar av lærestoffet kjem med i undervisninga. Fagplanane er forma som planleggingsgrunnlag, og legg opp til at læraren fyller dei ut. Det lokale læreplanarbeidet er det gjort greie for i den generelle delen, fyrst og fremst i kapittel 8. Fagplanane følgjer i hovudsak same disposisjonen. Dei byrjar med ei kort grunngjeving for kvifor faget høyrer med i skolen. Deretter er måla for faget stilte opp i punkt. Målformuleringane er eit program for undervisninga. Teksten som følgjer etterpå, kan innehalde synspunkt som utdjupar målet, og som elles er spesielle for faget og viktige for undervisninga. Spørsmål som gjeld lærestoff og progresjon i faget, er behandla i eit eige avsnitt. Synspunkt som er særskilde for faget og gjeld arbeidsmåtar og læremiddel, er og omtala i eigne avsnitt. Elles viser vi til den generelle delen i planen. Lærestoffet er delt inn i hovudemne, forma som breie og sentrale arbeidsområde. Faga har ulike tal hovudemne. Hovudemna varierer i storleik og stoffomfang, og arbeidet med hovudemna kan ta ulik tid. Hovudemna er nærare konkretiserte gjennom delemne. Delemna er i prinsippet sams for alle, men kan i ein viss grad skiftast ut på grunnlag av faglege og pedagogiske vurderingar. Kvart delemne er skildra med stikkord. Desse stikkorda har status som døme. Ved at lærestoffet er ordna på den måten, er det lagt vekt på sams kunnskapar og dugleik, samstundes som det er gjeve rom for lokale val og individuell tilrettelegging. Prinsippet om tilpassa opplæring krev at lærestoffet skal verte tilpassa kvar elev både når det gjeld art, mengd og vanskegrad. For at kvar elev skal få opplæring i samsvar med evnene og føresetnadene sine, kan ein velje bort eller velje til delemne og i somme tilfelle og hovudemne for einskildelevar. Tilpassa opplæring stiller særlege krav til planlegginga av undervisninga.

Mønsterplanen 1985 · nynorsk s. 89 skann 91

Siter