Mønsterplanen 1985 · nynorsk, s. 285 (skann 287)

285 LIVSSYNSKUNNSKAP Menneske har til alle tider freista å finne løysingar på grunnleggjande spørsmål som er knytte til livssyn og etikk. Innhald og praksis i ulike religionar og livssyn viser at menneske har funne ulike svar på slike spørsmål. Livssyn og etiske verdiar står sentralt i livet for kvart einskilt menneske, i forholdet mellom menneske og for kultur- og samfunnsliv generelt. Det er viktig å forstå og respektere ulike oppfatningar i livssynsspørsmål. Livssynskunnskap skal gje orientering om etikk og ulike livssyn - religiøse og sekulære - på ein slik måte at vi betre vert i stand til å leve saman og forstå og respektere kvarandre. Mål Undervisninga i livssynskunnskap skal ta sikte på - å gje elevane kunnskap om ulike livssyn, religionar og etiske problemstillingar - å gje elevane kjennskap til ulike freistnader på å løyse sentrale livsspørsmål - å stimulere elevane i den personlege veksten og utviklinga deira - å skape forståing for verdien av å ha eit personleg livssyn - å hjelpe elevane til å utvikle toleranse og respekt for menneske som har andre oppfatningar i trus- og livssynsspørsmål Undervisninga i livssynskunnskap skal bere preg av å vere vidsynt, allsidig og sakleg. Planen er konsentrert om etikk, religiøse livssyn og sekulære livssyn. I undervisninga om dei ulike religionane og livssyna må ulike etiske verdiar og trusstandpunkt og religiøse ytringsformer verte presenterte i samsvar med og i respekt for den historiske og kulturelle samanhengen dei står i. Det inneber at når ein underviser om ulike religionar og livssyn, må stoffet få tale ut frå særpreget sitt og med den tyngda stoffet har i seg sjølv. Sanningsinnhaldet i dei ulike religionane og livssyna kan ikkje provast, men det er ei trussak.

Mønsterplanen 1985 · nynorsk s. 285 skann 287

Siter