Mønsterplanen 1987 · samiske fagplaner 1989, s. 90 (skann 92)

KAPIHTAL 8 RUOVTTUDOALLO-OAHppu Ruovttudoallooahpu oahpahus galggašii addit ohppiide positiivvalaš oainnu ruktui, bearrašii ja servvodahkii. Dán fága vuođđun leat sámi árbbevierut ja eallinárvvut nu ahte oahppit ohppet áddet ja atnit árvvus iežaset duogáža. Skuvla háliida ovddidit ohppiid dieđuid ja oahppannávccaid nanu ovttasbarggu bokte gaskkal ruovttu ja skuvlla, nu ahte oahppit buorebut nákcejit čađahit juohkebeaivválaš doaimmaid, ja vai sii ohppet dovdat ovddasvástádusa guhtet guimmiideaset ovddas. Berre maid vuođđudit áddejumi ovttadássásašvuhtii ja movt rehalaččat juohkit bargguid ja geatnegasvuođaid/ovddasvástádusaid. Sihke gánddat ja nieiddat galget oahppat barggat ruovttu bargguid. Buozanvuođaid easttadanbarggu guovddážin galgá leat diehtojuohkin dan birra movt eallindábit váikkuhit olbmo dearvvašvuhtii, ja movt buori dearvvašvuođa sáhttá doalahit. Skuvla galgá oahpahit ohppiid dárkilvuođain iehčanasii máhttit beaivválaš eallima smávva válljemiid dahkat. Praktihkkalaš-buvttadeaddji barggut, mat vuolggašedje dain bargguin mat leat dárbbahlaččat ruovttuin, sáhttet addit hárjáneimiid gálggaide maid boahtteáiggis dárbbaša, ja dábálaš dovddiidusaid dan birra makkár gaskavuohta lea barggus ja bohtosis. Vehážiid mielde sáhttá dákkár dieđuid ja návccaid geavahit buorrin sierranas fuolahan bargguide. Ulbmil Ruovttudoallooahpu ulbmilin lea - oahpahit ohppiid váldit ovddasvástádusa ja čájehit beroštumi ruovttus ja lagašbirrasis - oahpahit ohppiid atnit árvvus ja fievrridit viidáseabbot iežaset kultuvraárbbi - addit ohppiide dieđu ja áddejumi man mávssolaš ruoktu, bearaš ja sohka lea sidjiide ja sámi servvodahkii - oahpahit ohppiid geahppasit bargat praktihkalaš bargguiguin mat dábálaččat gullet ruovttuide - oahpahit ohppiid jierpmálaččat geavahit vuođđoávdnasiid ja veahkkeneavvuid, ja dakko bokte čájehit ahte sii atnet árvvus daid riggodagaid mat leat gávdnamis

Mønsterplanen 1987 · samiske fagplaner 1989 s. 90 skann 92

Siter