Mønsterplanen 1987 · samiske fagplaner 1989, s. 43 (skann 45)

KAPIHTAL 4 BIRASFÁGA 1.-6. LUOHKKÁI Skuvla galgá veahkehit ohppiid šaddat ávkkálaš ja iešbirgejeaddji olmmožin ruovttus ja servvodagas. Skuvla galgá maiddái nannet ohppiid (subjektiivvalaš ja čearddalaš) iešdovddu ja addit sidjiide vuođu sámi kultuvrra fievredit ovddosguvlui. Birasfága lea gaskaoapmi mainna sáhttá seailluhit ja nannet sihke sámegiela ja kultuvrra. Eaktun dasa lea ahte oahppit ožžot oahpu iežaset birra ja ruovttu birra, sámi dološ ja dálá eallinvugiid ja servvodaga birra. Sii galget maid oahppat dovdat mii sámi kultuvrii váikkuha ja mot dat váikkuha. Dasa lassin dárbbašit oahppit máhtu luonddu, eallinvuodu ja tekniihka birra danne go olbmo birgenláhki lea nannosit čadnon lundui ja luonddu ávkkástallamii ja danne go luondu álo lea leamaš deatalaš oassin sámi kultuvrras. Min servvodat dárbbaša aktiivvalaš olbmuid. Oahppit fertejit danne bargat fáttaiguin mat gusket servvodatfágii ja luonddufágii vai sii sierralágan dovddiidusaid bokte movttiidit oassálastit ja vástidit boahtteáiggi servvodaga ovdáneapmái báikkálaččat, čearddalaččat sisriikkas ja riikagaskasaččat. Dát barggut leat lagas oktavuođaid geažil čohkkejuvvon ovtta fágaplánii mánaidskuvlla dásis. Ulbmit Birasfága oahpaheami ulbmilat galget leat: - addit ohppiide mángga bealálaš oahpu lagas birrasa ja kultuvrralaš duogáža birra, historjja ja servvodateallima birra ja luonddu ja geografia birra, - veahkehit ohppiid fuomášit sámi kultuvrra árvvu ja movttiiddahttit sin seailluhit ja nannet iežaset kultuvrra ja giela, - addit ohppiide iešluohttámuša ja jáhku ahte son, okto ja earáid searvvis sáhttá váikkuhit servvodaga ovdáneapmái, - oahpahit ohppiid áddegoahtit luonddu, servvodaga ja kultuvrra gaskasaš oktavuođaid, ja oahppat gáhttet eallinvuodu, dearvvašvuođa ja birrasa, - oahpahit ohppiid dovdat ovddasvástádusa ja čájehit beroštumi earáide ruovttus, skuvllas ja servvodagas, 43

Mønsterplanen 1987 · samiske fagplaner 1989 s. 43 skann 45

Siter