Mønsterplanen 1987 · samiske fagplaner 1989, s. 14 (skann 16)

Otná servvodat lea huksejuvvon vissis meriid mielde. Ruhtááigi, diibmomearit, mearriduvvon bargoáigi, media ja orrun čoahkkebáikkiin mearridit beaivvi sisdoalu. Dákkár servvodatsystema čatná olbmo vissis minstarii, man sisdoallu sáhttá šaddat ovtta lágán beaivvis beaivái. Duodji lea maiddái mielde suodjaleame kultuvrra go dikšu giela ja seailluha fágasániid gielas. Duoji čuovvu maiddái lunddolaš bargomokta. Konkrehtalaš bierggas mii dahkkojuvvo addá dávjá geavahanárvvu. Oahppit galget beassat dahkat juoidá mii lea juogamasa anolaš. Go oahppit oidnet ahte sin duojit leat ávkkálaččat, de iešdovdu maiddái loktana. Ja de dađistaga sii duostagohtet bidjat stuorit kvalitehta gáibádusaid iežaset dujiide. Nu loktana duoji árvu, ja boahttevaš buolvvaide addojit stuorát ja buoret vejolašvuođat doalahit duoji sámi eavttuid mielde. Duodjeoahppu lea vuos ođas skuvllas. Dan geažil gáibiduvvo buorre ja dárkilis plánen sihke oahpu dáfus ja maiddái duoji heiveheami dáfus skuvlii. Ruovttudoallooahppu Ruovttudoallooahpu fágaplána čuovvu ruovttudoallooahpu fágaplána M-87:s. Dás lea vuosttažettiin deahálaš deattuhit ahte ruoktu ja lagasbiras galgá leat guovddážis go álggaha oahpahusa ruovttudoallooahpus. Ohppiid iežaset kultuvra galgá leat vuođđun go oahpaha sámemánáid. Oahpahus galgá heivehuvvot ohppiide ja sin duogážii, ii fal ruovttogežiid. Fágaplánas sámi ohppiide galget leat mielde temát mat leat sierraláččat čadnon sámi kultuvrii, nu ahte oahpaheaddji lea geatnegahtton oahpahit daid birra. Ruovttudoallooahpu fágaplána M-87:s lea nu obbalaš ja rabas, ahte oahpaheaddjis lea vejolašvuohta válljet oahppoávdnasiid sámi birrasis, muhto dat addá maid vejolašvuođaid ollásit guođđit temáid mat livčče lunddolaččat sámemánáide. Uhccán leat oahpaheaddjit geat ieža leat ožžon oahpahusa mii lea heivehuvvon sámi skuvlii. Sámifágaplánas lea deattuhtuvvon man birra berre oahpahit, nu ahte sámemánát maid ožžot oahpahusa vuoigatvuođaideaset mielde. Plánas lea deattuhuvvon ahte oahpahusa praktihkálaš oasis berre geavahit báikkálaš biebmoveahkkeváriid nu ollu go lea vejolaš. Sámiin leamaš vierrun ollásit geavahit daid veahkkeváriid mat sis ledje. Oahppit berrejit oahpásmuvvat boares árbevieruide, muhto sii berrejit maid oahppat movt dovddus ráhkadanávdnasiid sáhttá geavahit ođđa vugiid mielde. Dán láhkái sáhttet sii molssodit biepmuset válddekeahttá atnui nu mánga ođđa amas ávdnasa. Go oahpahusas geavaha ráhkadanávdnasiid maid álkit fidne ruovttubáikkis, de sáhttet oahppit maiddái álkit geavahit dieđuidaset ruovttus. Muhtun surggiid ruovttudoallooahpus, omd. bearašdieđu, álkis biebmoráhkadeami jnv., galggašii oahpahit bajimus luohkás, dasgo oahppit fargga gártet vuolgit ollesolbmuid eallimii ja vuođđudit alcceseaset ruovttu. 14

Mønsterplanen 1987 · samiske fagplaner 1989 s. 14 skann 16

Siter