Læreplanverket 1997, s. 4 (skann 6)

FORORD Læreplanverket for grunnskulen er fastsett med heimel i lov og gjer nærmare greie for måla og prinsippa for opplæringa. Kommunane og leiinga og personalet ved skulane har enkeltvis og samla ansvar for at opplæringa er i samsvar med læreplanverket. Desse generelle måla og prinsippa ligg til grunn for den vidare utviklinga av grunnskulen: • Lik rett til opplæring for alle uavhengig av heimstad, kjønn, sosioøkonomisk bakgrunn, etnisk tilhøyrsle eller funksjonsdugleik • Ei opplæring som medverkar til eit felles kunnskaps-, verdi- og kulturgrunnlag hos alle, og som sikrar behovet for kompetanse både hos den enkelte og i samfunnet • Ei opplæring der innhald, struktur, arbeidsmåtar og omsorg sikrar at barn og unge får nytta evnene og anlegga sine, blir motiverte til innsats og får interesse for vidare opplæring • Ei opplæring som er best mogleg tilpassa dei lokale forholda og alderen og føresetnadene til elevane • Ei opplæring som gir god fagleg og pedagogisk samanheng mellom barnehagen, grunnskulen og den vidaregåande opplæringa • Ein skule som gir rom for lokal tilpassing av arbeidsmåtar, organisering av opplæringa og skulefritidsordninga • Ein skule som legg til rette for samordna og heilskapleg innsats for lærings- og oppvekstmiljøet • Ein skule som tek medansvar for oppvekstmiljøet og gir barn i alderen frå seks til ni år tilbod om omsorg og tilsyn utover skuledagen og skuleåret så langt barn og foreldre ønskjer det og treng det - der skulefritidsordninga gir funksjonshemma og sosialt vanskelegstilte barn gode vilkår for å ta del i samvær med andre • Ein skule som nyttar ressursane fleksibelt og er ein sentral kulturinstitusjon i nærmiljøet ved at han saman med foreldra byggjer ut samarbeidet med andre etatar, kulturinstitusjonar, med nærmiljøet og frivillige organisasjonar Læreplanverket for den 10-årige grunnskulen Læreplanverket omfattar tre hovuddelar: Læreplan for grunnskule, vidaregåande opplæring og vaksenopplæring. Generell del Prinsipp og retningslinjer for opplæringa i grunnskulen Læreplanar for faga Dei tre delane er samla i eit forpliktande og einskapleg læreplanverk for opplæringa i den 10-årige grunnskulen. Intensjonane i planverket når det gjeld informasjonsteknologi (IT), må likevel gjennomførast gradvis og tilpassast det som er økonomisk mogleg for kommunane. Den generelle delen av læreplanverket er innført med verknad frå september 1993. Denne delen inneheld dei overordna måla som opplæringa på tre utdanningsområde - grunnskulen, den vidaregåande opplæringa og vaksenopplæringa - skal sikte mot. Dei andre delane av læreplanverket gjeld særskilt for opplæringa i grunnskulen.

Læreplanverket 1997 s. 4 skann 6

Siter