Læreplanverket 1997, s. 55 (skann 57)

INNLEIING Opplæringa i grunnskulen skal gi grunnleggjande kunnskap, levandegjere kulturarven, stimulere til å ta lokalkulturen i bruk og inspirere barn og unge til å vere aktive og skapande. Barn og unge veks inn i eit samfunn gjennom å tileigne seg språk og symbol, verdiar og normer, kunnskap og dugleik. Kvar generasjon må få den opplæringa og dugleiken som skal til for å ta hand om sitt eige liv, meistre oppgåver saman med andre og ta ansvar heime og i samfunnet. Einskapsskulen skal sikre ei likeverdig opplæring og vere med på å gi ei positiv identitetsutvikling. Identitet og tilhøyrsle blir mellom anna utvikla når ein blir fortruleg med veremåtar, normer og uttrykksformer i fellesskapet - når ein tek opp i seg og vidareutviklar kunnskap, verdiar og holdningar. Å vekse opp vil seie å vekse inn i felleskulturen, samtidig som ein utviklar særpreg og eigenart. Det gir den enkelte forankring og tryggleik i kultur og tradisjon. Felles referanserammer er eit viktig grunnlag for mellommenneskeleg kommunikasjon og for å kunne ta aktivt del i eit demokratisk samfunn. Felles referanserammer gjer det mogeleg å kommunisere på tvers av kulturelle og geografiske grenser. Skulen skal derfor vere berar både av ein nasjonal kultur og av ein internasjonal kunnskapskultur. Samisk er ein del av den felles norske og nordiske kulturen som alle elevane skal bli kjende med. I ein fleirkulturell skule må fellesstoffet femne vidt - til andre kulturar og religionar. Trykket frå ein global mediekultur aukar. Der røynslene tidlegare i stor grad var lokalt prega, er dei no formidla og delte på tvers av nasjonar og kontinent. Felles referanserammer blir enda viktigare når kulturen blir internasjonalisert. Innebygd i forståinga av likeverd ligg føresetnaden om fellesskap mellom menneske. Likeverd er grunnlaget for prinsippet om lik rett til opplæring i ein felles skule utan omsyn til bakgrunn eller føresetnader. Likeverd er ikkje noko ein har - det er noko ein skaper. Skulen skal derfor utvikle, grunngi og praktisere fellesskap og tilpassing og fremje likestilling mellom kjønn og solidaritet på tvers av grupper og grenser. Læring i skulen skjer best når læringa utfyller, systematiserer og forklarer røynsler frå familie, nærmiljø og samfunn. Skulen skal utvikle den praktiske evna til å meistre ulike situasjonar og gi forståing for korleis ting heng saman. Oppgåva er ikkje alltid så mykje å gi dei rette svara som å øve opp evna til å stille spørsmål og stadig vere nyfiken. Skulen har eit medansvar for å skape eit godt oppvekstmiljø for barn og unge. Det må skje ut frå det verdigrunnlaget skulen byggjer på, og med foreldra som ein viktig samarbeidspartnar. Skulen har eit heilskapleg fagleg og pedagogisk ansvar for opplæringa, og skal skape eit variert og stimulerande læringsmiljø som fremjar eit rikt læringsutbytte. SIDE 55 PRINSIPP OG RETNINGSLINJER

Læreplanverket 1997 s. 55 skann 57

Siter